Een retrograden Hops no hannen virun den Referendum.

Jean Leick

Den Moment ginn vun den Politiker an doduerch och vun den Medien eng Serie Aussoen an de Raum gesat ginn déi net onbedéngt der Realitéit entspriechen. Dat ass natierlech eng Affär vun Standpunkt. Virun dem Referendum waren Elementer fir een Artikel virbereet ginn fir op d'Aussoen vun deenen 3 Buergermeeschteren Stellung ze huelen betreffend den Interview am Wort vum 3. November ("Nägelkauen im November"). Mir bréngen hei brutto Elementer vun der Virbereedung vun deem Artikel deen awer net um Blog publizéiert ginn ass well deen Moment gemengt ginn ass dat et net néideg wär. Mee et stellt sech awer eraus, no dem Referendum, dat Aussoen vun deenen 3 Buergermeeschteren verschidden Relatiwéierungen néideg maachen. An deem Sënn ass des "retrograd" Kommunikatioun net onbedéngt "moutarde après dîner". Mir haten an engem publizéierten Artikel um Blog "Les états d'âme après e referendum..." op méiglech Schwieregkeeten no dem Referendum higewisen. Mir schéngen voll an deem Szenario ze sinn.

Et geet hei net drëm fir Messer an der Wonn erëm ze dréinen. Mee d'Aussoen vun deem Interview kënnen net esou am Raum stoen gelooss ginn op Grond vun deem wat elo am Gang ass ze geschéien.

Hei sinn brutto Elementer vun deem Artikel.

„D'Äntwerten vun deenen 3 Buergermeeschteren sinn subtil, mee et kann een déi Kontexter och anescht gesinn. An dann kann Vertrauen an Politik schonns e gudde Koup méi kleng ginn. Den Här Eicher mengt Politiker hätten den Bierger kloer Argumenter geliwwert déi fir eng Fusioun schwätzen. Mee déi 10 Argumenter sinn éischter des "lieux communs" ouni Fundament, och wann een si se op den éischten Moment als rationell kënnen ugesinn ginn. De Grupp de réflexion huet d'Argumenter grëndlech ënnersicht op hirem blog www.onalif.blogspot.com (Analyse des arguments de la politique pour une fusion, article publié en septembre 2014 concernant le website de promotion de la commune de fusion Meesebuerg) fir festzestellen dat net méi vill iwwreg bleift vun deenen Argumenter an dass keng pertinent Plus-Valuen duerch eng Fusioun geschafen ginn.

Den Här Wies mengt Biergerforen wären konstruktiv gewiescht.  Dat kann een interpretéieren wéi een wëllt. Sécher ass dat awer vill kritesch Aussoen gemaach goufen.Ech huelen un dat den Här Wies Biergerversammlungen mengt. Do muss een awer soen dat zou Noumer an Fëschbech den Politiker éischter e rauen Wand ëm d'Oueren gefacht ginn ass. An déi 3 Buergermeeschteren konnten frou sinn dat den Minister Kersch méi wéi enger fir si d'Kar aus dem Dreck gezunn huet, esou gutt wéi hinn konnt.

Et ass richteg (wéi den Här Eicher seet) dat 2009 eng Ëmfro war, déi awer éischter net onbedengt a kloer zou Gonschten vun enger Fusioun ausgefall wor fir Noumer, Fëschbech an Hiefenech. Hiefenech ass dono ofgesprong vun enger Fusioun. An Noumer war och eng Zäit ofgesprongen. Gemengeresponsabel sinn dunn 2012 bei den Inneminister geruff ginn an op eemol war Noumer erëm derbäi. All déi Joren duerno ass de Bierger, entgéint deem wat den Här Eicher seet, net méi mat der Fusioun konfrontéiert ginn bis déi ominéis Workshopen Ufank 2014. Wéi huet ee prominenten Bierger gesot : Et gëtt en jo näischt gewuer.

Elo zu den Workshopen. Déi positiv Interpretatioun vum Här Eicher zu dësen Evenementer kann een huelen wéi een wëllt. Sécher ass dat awer vill kritesch Aussoen gemaach goufen. Ass dat eng vun den Ursaachen dat déi versprachen Rapporten ni un Bierger, déi matgemaach hunn, ausgedeelt goufen ? Oder waren d'Inhalter eventuell net esou substantiell wéi Politiker sech dat erhofft haten. An deenen Foren ass och gefrot ginn op Bierger virun well matschaffen. Dat ass massiv mat "Jo" beäntwert ginn. Duerno ass de Bierger guer näischt méi gefrot ginn an dass zënter Mäz 2014 keng partizipativ Aktioun vun den Politiker ënnerholl ginn. Wann Politiker mengen déi Workshopen wären esou super gewiescht, hunn se Tomaten op den Aen. Éierlecherweis misst een op mannst gedeelter Meenung sinn. De Fransous géif soen "prendre des vessies pour des lanternes".

Madam Brosius mengt dat Neiuerdnung vun de Gemengeservicer eréischt no der Fusioun misst ugepaakt ginn. All Mënsch weess dat Machbachkeet an den Mehrwert vun enger Fusioun, egal wat fir enger Aart, muss am Detail am viraus ausgeloot ginn. Wéi gesot, den Däiwel stécht am Detail. Déi aktuell Fusiounsgemengen weisen och, wann een der Saach op de Fong geet, net onbedéngt positiv Resultater aus wéi offiziell no baussen behaapt gëtt. Oft ass alles méi deier ginn an et sinn meeschtens nach méi Leit an deenen Gemengen agestallt ginn. An et sinn och oft Konflikter an den Gemengeservice opkomm déi virdrun net do waren. Wann de Bierger keen Modell vun der Neier Gemeng huet, keeft hien Katz am Sack. Wann elo Fusioun zustane kennt, an et mierkt en bis 2018 dat Saachen net esou einfach sinn wéi gemengt, dann ass et ze spéit.

Den Här Wies mengt, dat déi strukturell Ufuerderungen vum 21. Joerhonnert méi staark an effizient Gemengeverwaltungen brauchen. Et ass sécher dat nei strukturell Ufuerderungen kommen wäerten, virun allem wann Suen méi knapp ginn. Méi bréngen mir fäerdeg méi effizient Gemengeverwaltungen op Been ze setzen wann mir elo schonns net fäerdeg bréngen een iwwerzeegenden Gemengemodell, op mannst an méi grousse Linnen wéi elo ugedeit, op Been ze setzen an dem Bierger matzedeelen. Wann Gemengepäpp (Mammen) esou een Modell hätten, géifen si en doudsécher stolz dem Bierger weisen. Et schéngt mir onverantwortlech dësen Aspekt net virun dem Referendum am Fong behandelt ze hunn, dëst ëmsou méi dat net sécher ass dat déi 3 Buergermeeschteren no 2018 nach derbäi sinn.

Madam Brosius mengt dat een sektoriell Pläng an Fusioun net soll vermëschen. Da soll si emol erklären firwat an der Konventioun folgendes am Artikel 2 steet :

Article 2

      (1) Les projets à réaliser prioritairement dans le cadre de la fusion sont les projets suivants :

·         La réseau d’un réseau intercommunal de distribution d’eau potable pour la sécurisation de l’alimentation en eau potable ;

·         L’agrandissement des centre scolaires et des structures d’accueil existants pour assurer la capacité requise pour le bon fonctionnement des infrastructures scolaires dans chacune des anciennes communes ;

·         La création d’une zone d’activités économiques pour accueillir des activités artisanales dans le but de créer des opportunités d’emploi et de commerce :

·         L’amélioration des réseaux d’eaux usées y compris la construction de nouvelles stations d’épuration pour se conformer à la loi en vigueur. 

………….. ».

Zone d'activité ass expressis verbis ernimmt. Esouwäit zou enger net Vermëschung. Déi do Aspekter sinn och a puer Artikel um blog onalif am Detail analyséiert ginn : ZAE d’Angelsberg, incidences possibles ...../ Questionnement concernant les activités économiques dans le cadre de la fusion / Développement des structures économiques : quid en cas de fusion. Dee leschten Artikel ass schonns am Februar 2014 publizéiert ginn, laang e Plans sectoriels eraus komm sinn.

Wat déi aner Projeten ugeet sinn mir schonns an der purer Perversioun :

Den „réseau intercommunal de distribution d'eau potable » ass schonns länger Zäit an der Planung. Wëllt déi Konventioun heeschen dat, wann keng Fusioun kennt, dee Projet ofgeblosen gëtt.

Schoulen zu Noumer a Fëschbech sinn modern an an der Rei. Noumer huet ee Stack op e Gebai gesat (de Bau ass bal fäerdeg) fir deenen neien Ufuerderungen vun der maison relais gerecht ze ginn. Maison Relais zu Fëschbech ass an der Planung. Doniewent haten Gemengenautoritéiten och nach deen néidegen Terrain kaaft fir den Primär auszebauen wann et géif néideg ginn(chapeau fir dës Mesure). Just Fiels muss massiv ausbauen (tëschent 15 a 20 Milliounen schéngen am Raum stoen). Wahrscheinlech sollen Subsiden vun enger Fusioun hëllefen déi groussen Projeten ze finanzéieren. Mee erëm : ginn déi Projeten net gemaach wann keng Fusioun kënnt.

Wat Kläranlag ugeet, muss een soen dat Gemeng Fëschbech ee Projet vun enger neier Kläranlag schonn zënter Joren am Geschir huet, dovun ofgesinn dat déi 3 Gemengen  esouwisou schonns elo an 2 Ofwaassersyndikater sinn. Och dorunner dierft eng Fusioun näischt änneren. Och wann keng Fusioun kennt, mussen all Kläranlagen esou moderniséiert ginn dat si den rechtlechen Normen entspriechen.

Den Här Wies mengt dat den Filano ee gutt Beispill vun Gemengenzesummenaarbecht ass. Do huet hien och Recht. Mee an den Biergerversammlung huet hien sech breet gemaach fir den Filano opzeléisen an an eng Fusiounsgemeng ze integréieren well déi haiteg Gestioun ze vill komplizéiert ass. Mee kann  een sech awer net virstellen dat Fusiounsgemeng aus deen sëellegen aneren Syndikater géif austrieden an déi Saachen selwer an Hand wëllt huelen. Dofir sinn Mëttelen net do.

Den Här Wies huet Recht wann hien seet dat Ofsécherung vun der Waasserversuergung prioritär ass. Mee Waasserversuergung vun den Gemengen Noumer a Fëschbech ass um leschten Stand. Just den réseau intercommunal feelt nach an deen ass souwisou an der Maach. Mir wëssen allerdéngs net wat den Stand vun der Waasserversuergung vun der Fiels ass. Wat Pestiziden an Insektiziden betrëfft, ass déi Gestioun vun den rechtlechen Normen ofhängeg, och wann eng Gemeng kann nach méi maachen wéi dat wat legal virgesinn ass. Et weess een jo och dat Normen oft net streng genuch sinn wat Gesondheet betrëfft. Sou sinn fir Nitrater e Seuil vun 50 Unitéiten virgesinn well d'Norm vun 25 Unitéiten, déi méi ubruecht ass, nitt ëmmer kann erreecht ginn an dann Problemer do wären déi schwéier kënnten geléist ginn.

Insgesamt sinn Äntwerten vun den Politiker an dëssem Interview pur Demagogie. Si entspriechen net den Realitéiten. Et kann een schonns bal soen dat se dem Ausdrock "mentir par omission" entspriechen.  Wann een déi Argumenter méi kritesch kuckt, bleift net vill fundamentales fir eng Fusioun iwwreg an Politiker hunn praktesch näischt an der Hand fir eng Fusioun positiv duerzestellen. Et muss een awer och soen, dat déi haiteg Situatioun vun deenen 3 Gemengen net fir eng Fusioun sprécht well Politik vill geleescht huet an deenen leschten Joren an e reellen Bedarf vir eng Fusioun de Moment net besteet. An deem Sënn wär een Nee zu der Fusioun éischter een „Hommage“ un Politik an Politiker wären Opfer vun hiren Leeschtungen.

Wann een méi ausgefeilten Szenario vun enger Fusiounsgemeng géif bestoen deen iwwert dat eraus geet wat elo souwisou besteet oder schonns an der Maach ass, kënnt een éischter  iwwert eng Fusioun nodenken. Mee dat ass net de Fall. Dorun kann een awer och an der Zukunft schaffen mat enger richteger Biergerbedeelegung (bottom-up an net top-down wéi bis elo)  an dann, wann gutt Argumenter a keng Loftschlässer sech erausschielen, Fro vun esou engem Referendum a puer Joer erëm stellen

Mee dofir muss eng richteg a permanent bottom-up Biergerbedeelegung an Wee geleet ginn. An dann soll a puer Joer een Bilan gemaach ginn op eng Fusioun opportun ass fir wichteg Saachen ofzedecken déi net anescht kennen gehändelt ginn oder op aner Formen vun Kollaboratioun net méi opportun sinn.“

Wéi gesot, déi hei Elementer datéieren vun virum dem Referendum.