Nach eng Reaktioun op dem Här Kieffer säin Leitartikel

Den Här Kieffer schéngt an engem  Beiennascht gesteppelt ze hunn.

Dës "prise de position" ass als alleréischt un den Här Kieffer per email virugeleet ginn.

"Här Kieffer,

ech sinn och ee vun deene Bierger aus der Gemeng Noumer déi géint d'Gemeng Meesebuerg gestëmmt hunn.

Mee ech muss Iech soen, dass dat awer och glat a guer näischt mat de portugisesche Matbierger aus der Fiels ze dinn hat.

Et war och net spezifesch wéinst der Schoulorganisatioun, meng Kanner ginn nämlech net méi an d'Primärschoul, et war net wéinst der Drénkwaasserversuergung, déi zu Noumer absolut an der Rei ass an net wéinst de Finanzen.

Et war vill méi als Konsequenz vun enger ganz schlechter Informatiounspolitik säitens de Schäfferéit, wéinst der Tatsaach dass d'Bierger aus deenen 3 Gemengen ni an iergendenger Manéier iergendeppes zesummen gemaacht hätten an dowéinst dass di divers Workshopen en vue vun der Fusioun vill ze spéit koumen fir en Zesummegehéiregkeetsgefill opkommen ze loossen.

Ech wollt a wëll net mat der Fiels fusionéieren, well ech mat der Fiels absolut näischt um Hutt hunn. Ech wunnen zu Cruchten, wat ee Bauerenduerf ass, genee wéi Noumer a Schrondweiler. An ech fannen dass dat eben net bei d'Fiels passt, well d'Fiels eendeiteg een anere Profil huet. Dir kënnt lo soen, ech wier klengkaréiert a bornéiert, dat mach sinn, mee ech hunn näischt géint Auslänner am Allgemengen a géint Portugisen am Speziellen. Et liewen och Portugisen an eiser Gemeng, an ech kann Iech soen dass se ganz gutt mat de Lëtzebuerger Leit aus eiser Gemeng eenz ginn an dass ech der selwer kennen déi och keng Fusioun wollten. Ech hunn och géint eng Fusioun gestëmmt, well et, menger Meenung no, lo nach absolut net noutwendeg ass. Wéi gesot, dat kann an Ären Aen falsch sinn, mee et ass mäi gutt Recht sou ze denken.

Mee wien huet Iech eigentlech gesot, datt "eendeiteg" mat aneren "Argumenten und Reflexen beim Bürger gezündelt wurde"? Vläicht de Buergermeeschter aus der Fiels, dee säi Frust iwwert deen angeblichen "Affront" wollt lass ginn? Wien huet da mat deenen auslännerfeindlechen Argumenter "gezündelt"? Ech hu kee begéint! Ech kann Iech soen dass d'Leit ganz vill diskutéiert hunn, mee a menger Géigewaart waren di vill Auslänner eigentlech keen Thema. Et war vill méi well d'Leit keng anstänneg Äntwerten op hir Froe kruten, datt se et virgezunn hu géint d'Fusioun ze stëmmen. Et ass mer absolut kloer dass et Leit zu Noumer a Fëschbech gouf déi aus dem vun Iech genannte Grond net wollte fusionéieren, mee fir di 76 %, resp. 70 % déi dergéint ware pauschal als Portugisen- oder Auslännerhaasser dohin ze stellen, ass dach awer ee ganzt staarkt Stéck. Et kann een och eppes erbäi schwätzen - oder schreiwen - , sou wéi Dir et an Ärem Artikel maacht, an de Leit hiren Neen als Auslännerfeindlechkeet duerstellen. Mee da kann een Iech och ënnerstellen Dir wiert sensatiounshongereg a géift probéieren Zwietracht ze séinen. Well är Ënnerstellunge sinn nämlech net beluecht, et ass waarm Loft, oder hu Dir een heemleche Sondage gemaach wou Leit sech bei Iech "ge-out" hunn? Ech fannen et wierklech allerhand wat der do schreift! Mee et liest sech gutt wann een an der Zeitung sou eppes an ee Walresultat eran interpretéiert, "déi béis, béis Noumer a Fëschbecher Leit, déi eppes géint d'Fiels hunn well do méi Auslänner wéi Lëtzebuerger wunnen". Da kënne mer lo mol mam Fanger op dee rassistesche Pak weisen.

Zu Ärer Informatioun hei nach aner méiglech Interpretatioune vum Resultat: Wann een als Politiker mengt, just well ee vill Stëmme krut bei de Gemengewale, géifen d'Leit maachen wéi een et selwer fir richteg fënnt, ass dat eng Feelaschätzung. A wann een an der Press deenen déi géint eng Fusioun sinn ënnerstellt, se hätte kee gesonde Mënscheverstand, da muss een sech net wonneren wann een d'Quittung kritt. A wann ee probéiert d'Leit mat engem romantesch-kitschige Film fir sou ee wichtege Projet wéi eng Fusioun ze gewannen, anstatt mat zolitten Argumenter, ass ee selwer blauäugig, well déi Leit sech dann zolitt ver****t fillen. A wann een de Leit seet "et bleift alles beim Aalen", da muss een sech och net wonneren wann se dat Aalt wielen. A wann um Niveau vun den Awunner vun deenen 3 Gemengen ni eng Zesummenaarbecht,  wat fir enger Natur och ëmmer, do war, muss een sech net wierklech wonneren wann d'Leit Angscht hunn, wann aus enger klenger Landgemeng an Zäit vu puer Joer déi 5-gréisst a Lëtzebuerg gëtt. A wann déi Politiker déi d'Fusioun ustriewen, net bereet si kloer ze soen dass se och nach am Boot sinn wann d'Detailer vun där Fusioun ausgeschafft ginn, kann et sinn dass d'Leit Angscht hunn virun deem wat op se duerkënnt.  A wann ee schlussendlech mengt d'Leit hätte mat simplisteschen Argumenter Angscht gemaach kritt, dann muss ech soen dann hätt ee mat besseren Argumenter misste konteren. 

Voilà, dat wollt ech Iech soen. Dir wäert et lo wahrscheinlech sou interpretéieren dass et ass wéi d'Sprachwuert seet "c'est la vérité qui blesse",  ech weess dass et net sou ass, mee ech hunn Ären Artikel einfach ënnert aller Klarinett an een Affront fonnt, vis-à-vis vun de Leit vun Noumer a Fëschbech.

Mat beschte Gréiss

Rose Mühlen